Edit

About Us

We must explain to you how all seds this mistakens idea off denouncing pleasures and praising pain was born and I will give you a completed accounts off the system and expound.

Contact Us

 Eugenia Andries

Mi nomber ta Eugenia Andries-Croes, miho conoci como Jenny, y mi ta candidata number 8 riba lista di partido Transforma PPA. Mi ta mama di dos yiu homber, casa, doño di mi propio negoshi y fundadora di ‘Renew Women Aruba’. Esaki tin como vision pa inspira speransa y contribui na e bienestar general di e hende muhe.
Mi a completa mi estudio di Electrotechniek aki na Aruba y mi ta considera esaki un gran logro pa motibo cu ta solamente hende hombernan tawata mustra interes den e materia aki y tawata domin’e. Mi a cuminsa labora como un Tecnico di IT, a sigui crece como un Specialista di Software y actualmente mi ta un consultante di IT independiente.
Pa medio di mi negoshi, mi a organisa varios cursonan pa diferente companianan. Cursonan manera Administracion di Sueldo orienta riba Practica, Administracion Financiero, Derecho Laboral den Practica, Loonbelasting, Contribucionnan Social y mucho mas. Ademas, durante hopi aña mi a duna consulta, training y sosten na diferente companianan y departamento di gobierno den con pa ahusta y mehora nan procesonan na forma digital. Tambe mi a yuda organisacionnan establece un centro di entrenamento pa nan empleadonan y clientenan.
Sin duda, mi pasion ta pa identifica un problema y bin cu un solucion hunto cu e organisacion. Mi ta kere cu hendenan y organisacionnan ta crece pa motibo di esaki. Y mi ta stima mi trabou pasobra mi ta gusta traha cu hende.

Banda di mi pasion pa identifica problema y solucion’e, mi tin un pasion mas grandi ainda pa yuda hendenan den nan desaroyo emocional, salud mental y crecemento spiritual. Durante 20 aña largo mi a traha tras di cortina como boluntario den diferente proyectonan pa muchanan, hobennan, parehanan y hende muhe. Hunto cu un team, nos a organisa varios charlanan, tayer, conferencia y lesnan di terapia pa mas cu 200 hende muhe tocante e tema di depresion, identidad, balor propio y mucho
mas. Tambe mi a wordo invita pa duna charlanan na Corsou, Bonaire y Merca na varios grupo di hende muhe.
Mi a lanta sin mi tata, pero mi mama, un muhe fuerte y balente, a traha duro pa duna’mi un educacion. Mi no ta bin di un famia di negoshantenan ni politiconan, mas bien di un famia humilde cu ta traha duro pa por duna nan yiunan e miho cu tin, cual ta educacion, dignidad y amor pa prohimo.
Mi ta kere cu si ami por, otro hende muhenan tambe por. P’esey ta importante pa nos como hende muhe apoya otro, motiva otro, yuda otro y promove otro. Mi ta autentico den mi forma di traha y mi motivacion ta pa trece solucion.

Pues, cu bo sosten, Aruba, mi lo traha incansablemente pa lansa programanan y proyectonan pa duna e sosten social necesario na famianan den nos comunidad. Y ta esey mi ta para p’e. Mirando mi experencia extenso como boluntario den proyectonan pa nos comunidad y mi pasion pa yuda hende, mi ta cla pa aplica mi conocemento pa yuda mi pueblo. Aruba, ban p’e cambio!